Блакітны анёлак і ружовыя прышчэпкі.

Віншую ўсіх праваслаўных вернікаў з Раством Хрыстовым і жадаю ўсім толькі светлых і добрых думак,  шчырасці і зычлівасці, здзяйснення мар і надзей! 

 

 Каб зрабіць фотаздымкі сваіх прышчэпак больш святочнымі, пазычыла анёлка, якога нехта падарыў маці майго мужа (не вельмі люблю слова "свякруха"), таму схему анёлка не ведаю. А гісторыя стварэння гэтых прышчэпак такая. Усё пачалося з таго, што Наташа пашыла вельмі прыгожую і патрэбную рэч - вось такія кішэні. У той жа дзень мой спіс жаданняў стаў большы яшчэ на адзін пункт ))) Я ўжо ў думках і тканіны выбіраю, і аздабленні розныя прыдумваю. А пачаць вырашыла з прышчэпак. Ну як у такую прыгожую (у марах) кішэню складваць мае ўжо страшэнныя прышчэпкі?! 

Гэта мая ўжо сапраўдная спроба дэкупажу. Былі яны звычайнымі драўлянымі, кітайскай вытворчасці, жудаснай якасці,  рознага памеру, колькасць 36 шт. Выкарыстоўвала верхні слой сурвэткі, белую акрылавую фарбу і акрылавы лак. Шліфавала некалькі разоў, але першапачатковы выгляд быў такі дрэнны, што змены не вельмі прыкметныя, але на дотык прышчэпачкі сталі вельмі прыемныя.

 

Некалькі зрабіла з іншым малюнкам. Вельмі спадабаўся працэс, хоць цярпення на 72 штукі ледзь-ледзь хапіла.